YARALI NƏĞMƏ poema
Proloq:
Bəyaz qar örtüyü,
Tül bir pərdədir.
Bir mahnı,
Qaldırıb duman ahını,
Qəlbimdə
Qırılmış simi titrədir...
Durub düşünürəm...
Sübhə xeyli var.
Görəsən hardadır cavan nəğməkar?
Hanı boz düzlərin
Kralı nəğmə.
De harda cırpındı
Yaralı nəğmə?!
I
Biz beş il cəbhədə
Yandıq, əridik.
Öndə kəşfiyyatda, -
Beş nəfər idik.
Bizə beşgüşəli
Ulduz dedilər.
- Nəğməsiz qaldıq susuz, - dedilər.
Gecəni hürküdüb,
Sübhü oyatdıq.
Nəmiş səngərlərə,
Nəğmə boşaltdıq.
Yuxusuz bilinər
Yuxunun dadı.
Beş il gözlərimiz
Cimir almadı.
Bir nəğmə, beş dodaq,
Ah, soloya bax!..
Onu gör
Kim çəkir zilə cəbhədə.
Vəcdə gələrək,
Döyüşcü gərək
Nəğmənin qədrini bilə cəbhədə.
O cavan nəğməkar,
Beşlərdən biri.
Məndən soruşmayın
Qalıbmı diri?
I I
Qarlı meşə yolu,
Keçir bölmələr.
Diksinib,
Uyğudan oyandı səhər.
Öndə
Beş nəfərik,
Beş ağxalatlı.
Özümüz piyada, fikrimiz atlı.
Sərvaxtdır qaz kimi iti fikrimiz,
Qar üstə
İlk cığır,
İlk ləpir,
İlk iz...
Düşən sırsıra buz,
Meh dəymiş budaq,
Elə səs salır ki, dünya qopacaq.
Sükutun
Səsi də əcaib olur.
Qabaqda bir təpə
Cəndə qeyb olur.
Aha, qaraltı var! Ah, top lüləsi.
Budur
Taxta-torpaq atəş nöqtəsi...
Bizdən az kənarda partladı mərmi.
Onlar
Gördülərmi,
Görmədilərmi?!
Alayın
Taleyi indi bizdədir.
Yaxşı ki, onları meşə gizlədir.
Süründük çalaya,
Baxdıq alaya...
Onlara
Çatmışdı top hənirtisi..
Ququ quşlarının gəlirdi səsi...
I I I
İşıqlı güllələr
Dumanı yardı.
Başımız üstündə tufan qopardı.
Gəldi,
Alov gəldi,
Güllə nə gəldi,
Qazancamı dəldi.
Sındı papağımdan
Düşdü ulduzum.
Çox şükür
Qar üstə
Beşdi ulduzum.
Beşi də salamat,
Beşı də canlı!
- İkisi evlidir,
İkisi subay,
Biri nişanlı...
Sərdik qar üstünə
Göy çantaları.
Düşmən izimizi itirsin barı
Hərəmiz
Biz ağac dibində yatdıq.
Biz soldan süründük
Düşmənə tərəf.
Sağdakı çantalar olmuşdu hədəf.
Düşmən fişəng atır,
Ətraf apaydın.
Oxucum,
Kaş orda,
Orda olaydın.
Olaydın, görəydin
İnam hissəsini,
Düşmənə
Düşmənin sönməz kinini.
Qəlbimiz:
- Qələbə! – deyirdi bizim.
Vətənim! – deyərək
Əridib qarı,
Təpəyə sarı
O vaxt
Sürünürdük dizin-dizin.
İnam
Dağlar dələr,
Qaya parçalar.
İnam
Gerbimiztək
Ayda ucalar.
İnam
Bir biləkdə,
Min fil gücüdür.
İnamsız
Olmayın,
İnam vergidir!
...Sürünür beş həyat,
Əldə avtomat.
Sürünür beş cavan,
Beş canlı insan.
Alışır məhəbbət,
Yanır beş həsrət.
Dinlə, ey beş sevgi,
Ölüm deyir ki:
- Başınız üstündə mən fit çalıram.
Sizə,
Ölüm adlı
Tvist çalıram.
İnam
Baş qaldırıb sizə deyir ki:
- Həyatda ölüm var,
Həyatda sevgi.
Sevginin
Mərdlikdə axtarsa insan,
Keçər
Müharibə tufanlarından.
V I
....Təpəyə
Beşküşə ulduz sürünür.
Beşküşə
Bir anda beş də bölünür.
Betonlu,
Müəzzəm
Uca təpəni, -
Alaylar
Saxlayan bu məntəqəni, -
Beş küşə,
Beş qanad,
Beş canlı həyat,
Beş cavan kommunist alır dövrəyə,
Alaylar ölündən qurtarsın – deyə!
Artıq mənzildəyik, artıq ordayıq.
Kiçik post içində
Əlbəyaxayıq.
Onlar beş,
Biz beşik.
Burda vuruş var.
Bu dəmdə
Əllərdə bıcaq parıldar.
Kinimiz
Sıyrılmış qılınc kimidir.
Qaranlıq...
Bilinmir,
Kim-kimi didir.
Birdən
Tez yadıma düşdü fanarım,
Çəkib yandırdım.
- Ey nəğməkarım!
Sağmısan?
- Mən sağam.
- Bəs sən?
- Mən də sağ!
...Təpənin üstündə yelləndi bayaq!..
Elə məmnun durub baxırdıq ki, biz...
Bu an,
Nəğməkarın
Dodaqlarından
Axdı nəğməmiz.
Nəğmə elə axdı ki...
Nəğmə bir bulaqdı ki,
Yanar dodağımızdan
Su kimi axdı, keçdi.
Bu nəğmə çeşməsindən,
Bütün alaylar içdi.
Bu döyüş mahnısını
Bu həyat nəğməsini;
Bu nəğməkar əsgərin
Könül təranəsini
Meşələr təkrar edib,
Düzlər döşünə yazdı.
Mənə elə gəlir ki,
Biz çox şey itirərdik,
Bu nəğmə olmasaydı...
V
Birdən qəfil güllə
Dəydi oğlana
Ah, cavan nəğməkar qəqr oldu qana.
Düşdü
Dodağından yaralı nəğmə,
Sinəsi neştərli, paralı nəğmə.
O öldü....
Qanadtək tez sındı mahnı,
Düşüb,
Kol-kol üstə çırpındı mahnı.
Əlimi uzatdım, tuta bilmədim,
Şərqi
İnildədi,
Mən inildədim...
Bir duman tülünə büründü nəğmə,
Qarlı düzənlərdə süründü nəğmə...
Epiloq
Ömrümdən
Sovuşub keçdi fəsillər.
Gümüşü toz səpdi başıma illər.
Xatirə gah acı,
Gah şərbət dadır.
Görəsən o nəğmə indi hardadır?
Xəzərin səmavi dodaqlarından
Səs gəlir bu an:
O nəğmə
Hər qəlbin güşəsindədir,
O nəğmə buruqlar meşəsindədir.
O nəğmə sevgitək safdır, təmizdır.
O bizim məhəbbət təranəmizdir!..
Mən göyə baxıram,
Yerə baxıram,
Qanadı
Nəğməli şerə baxıram.
O gözəl mahnının
sədası gəlir.
Cavan nəğməkar da,
Hər il baharda
Əynində cəbhəçi libası gəlir.
Polada döndərib iradəmizi
Həyata çağırır o nəğmə bizi!..
İslam Səfərli 1967-ci il